Luk 16 | MHL | STEP | Yeesus ona teeria arekin opora wia iromami wia maakek, “Maamuma mua-ko mua oko uuwowa woos mua wuak, maa unowa urufowa. Iir oko opora feenap miimak, ‘Nena uuwow woos mua-ke maa unowa oram maneka nefar fufurumem-ikaiya.’

Luke 16

Uuwow woos mua amis onaiya ikua nain arekin opora

1 Yeesus ona teeria arekin opora wia iromami wia maakek, “Maamuma mua-ko mua oko uuwowa woos mua wuak, maa unowa urufowa. Iir oko opora feenap miimak, ‘Nena uuwow woos mua-ke maa unowa oram maneka nefar fufurumem-ikaiya.’ 2 Naeya mua nain farep maakek, ‘No oram yo opora feenap nefar miimam? Yo maa muutitik no maifa-pa siisimem-ikon nain aawep pekape. No woos mua-pa ikowa aakisa nefa welawiyem.’ 3 Naeya o feenap kema suuwak, ‘Yo woos mua-pa ikem nain efa weeser-wueya yo kamenap arinen? Yo miiwa fookowa nain oona wia, ne maa enowa marew ikok mua oko wia nomarowa emina ururinen. 4 Aa, yo aakisa feenap oninen, ne ikoka saria efa iirareya-na mua papako-ke efa kemalep efa aawiwkin anane wi wiar ikainen.’ 5 Naap maep wi mua ona saria muuna wiar wuamik nain wia farek. Mua ookikir kererek nain nokarek, ‘No muuna kamin wuan?’ 6 Ne os-ke maek, ‘Wel muuna wuam nain amin mane-maneka andet kuisow.’ Naeya woos mua-ke maakek, ‘Nena muuna wuan maifa fain aawep ewur akena amina ten ikur muutiw siisime.’ 7 Ne mua oko farep nokarek, ‘No muuna kamin wuan?’ ‘Yo inasin emera muuna wuam nain bek andet kuisow,’ naeya maakek, ‘Nena muuna wuan maifa fain aawep ten ikur okaiwi-pa arow muutiw siisime.’ 8 Naap oneya ona saria-ke miimap maek, ‘Mua faa, maa kema suuwap maa oniya,’ naap maek. Naapeya wi miiwa fain mua wiena miiw sira nain ookami kema suuwap maa onimik. Ne wi mua parin onaiya ikemik nain naap me onimik.

9 Naapeya nia maakiyem, ni maamumaiw mua wia asipami nomar wia aroweka. Ni naap onam-ikok umowen-na nia aawep owow iinan-pa nia wuiwkin anane maneka eliw ikowen. 10 Ne mua maa gelemuta baliwep kakaltinon-na maa maneka pun eliw kakaltinon. Ne mua maa gelemuta samor kakaltiya nain maneka pun naap oninon. 11 Ni miiwa fain maamuma samora nain baliwep me kakaltowen-na, ikoka kakaltow maa eliw akena nain Mua Maneka-ke niinon-i? Weetak. 12 Ne ni mua oko maa baliwep me wiar kakaltowen-na, ikoka niena maa kakeniw nain aawowen-i? 13 Uuwow mua kuisow saria erup wiar uuwowa nain me pepek. O-ko saria oko kookalep oko mikikira iwinon. Neemi saria oko balisow uuwowa onami saria oko mokoka kapi urufinon. Ne sira naapiw, ni maamuma kookalowa-pa uuwami Mua Maneka uuwomowa nain me pepek.”

Sira kekanowa ne Mua Maneka pika kemena wiar ekowa opora-ke

14 Wi Farisi-na wi maamuma kookalowa-ke. Naapeya opor unowa Yeesus maek nain wiar miimap firekami amap-niiremik. 15 Naeya wia maakek, “Ni mua unowa mokoka-pa niena sira eliwa saarik oniman nain Mua Maneka kema iiriw nia amisarek. Wi mua-ke maa oko maneka-ke naimik, nain Mua Maneka mokoka-pa maa nain samor maneka-ke. 16 Iiriw Moses sira wuomakek nain ne wi profet opor unowa wia maakem-ikemik nain ekapep Yon epa-pa. Ne Yon epa-pa ekapep aakisa Mua Maneka pika kemena-pa wiar ikowa opora nain ariman wuiwkin wi mua unowa kekanep pika kemena wiar ekamik. 17 Aapereka miiw onaiya ikoka eliw mesenalinon, nain Moses sira wuomakek nain opor ara gelemuta-ko me mesenalinon.”

Yeesus muewowa puukowa sira nain maek

(Matiu 5.31-32 ne 19.9, Mak 10.11-12)

18 “Mua-ko ona emeria iirarep oko aawinon-na soma orainon. Mua ona emeria iirareya mua oko-ke wiar aawinon-na mua oko nain pun soma orainon.”

Maamuma mua Lasarus ikos opora

19 Ne arekin opora oko feenap wia maakek, “Iiriw maamuma mua oko-ko, mua nain anane mia suuwowa ele-eliwa suuwam-ikua, ne maa enowa ele-eliwa enem-ikua. 20 Ne ona koor omopora mamaiya-pa mua ikemikiya nan wuap-puiwkin ikua, unuma Lasarus. 21 Mua nain maa enowa sowa oraiya nain wiar aawep enimekam naep nan ikua. Ne siowa pun anane ekapep ikemika oposia wiar alimakem-ikemik. 22 Naap ikok o umok. Umeya wi ensel-ke aawep iinan pikiwep Abraham kemena-pa wiar wuamik. Ne maamuma mua nain pun umok. Umeya soopamik. 23 Mua nain ikiwep mukun yoowa-pa ikok mia tiitinowa manek akena aawem-ikua. Ne iinan mokakek-na Abraham Lasarus ikos epasia akena-pa ikaiwkin wia urufak. 24 Wi wia urufap Abraham farek, ‘Oo nembesir, yo efa kemalep Lasarus sesekeya ekapep wapen tetelka eka-pa suuwap yo omaiwa-pa wuomeya lawisiw-ko dabelalinok. Yo mukun yoowa-ke efa aaweya samor akena awem-ikaiyem.’ 25 Naeya Abraham-ke maakek, ‘Nembesir sa, no kema suuwe, iiriw no miiwa-pa ikon nain maa eliwa unow akena aawem-ikon ne Lasarus wiisak, weetak akena. Nain aakisa o owow eliwa-pa ikaiya, no samor aawem-ikain. 26 Ne maa oko pun, Mua Maneka-ke feenap onak, gone-pa kokor maneka fookak. Naapeya mua fan ikemik nain okaiwi ekowa me pepek. Ne nis pun naap feek epowa me pepek.’ 27 Ne mua nain-ke nainiw maakek, ‘Nembesir-na, naap nain Lasarus sesekeya owowa yiar ikiwep yena aamun wiam ikur nain opor kekanowa wia maakinok. Oko wis pun yo yookikuan.’

29 Naeya Abraham-ke maakek, ‘Moses ne wi profet opora wi wiar ikua, nain miimuk.’ 30 Ne os-ke maek, ‘Weetak, wi opora me miimikuan. Mua iiriw umemik nain-ke iikirap wi wiar ikiwikuan-na, kema eliw kirikuan.’ 31 Ne Abraham-ke maakek, ‘Moses ne wi profet opora me wiar miimikuan-na, mua umep ikok iikiriya nain pun opora makena-ke me wiar naikuan.’”